Եղիշե Չարենց
Գիտե՞ք, որ գարուն է արդեն,
Բոլորը թափվել են փողոց.
Լսո՞ւմ եք անուշ մի զնգոց —
Գիտե՞ք, որ գարուն է արդեն։
Դյութում են շրթերը վարդե,
Սրտերը կրակ են ու բոց-
Գիտե՞ք, որ գարուն է արդեն,
Բոլորը թափվել են փողոց։
1.Ներկիր այն տողերը, որոնք հուշում են, որ գարուն է:
2. Ինչպիսի՞ն կարող է լինել գարունը՝ կանաչ, թիթիզ….
Լեզվական առաջադրանքներ՝
1.Ան մասնիկը միացրու բառերին և նոր բառեր ստացիր՝
Գլուխ, գույն, համ, տուն, հավես, ձայն, ուշադիր, պոչ, լույս, ջուր, կարգ, մահ, քուն:
2.Հետևյալ բառերը վանկատիր. մեքենա, հոկտեմբեր, դանդաղաշարժ, լսափող, դասագիրք, շնաձուկ, մրջնակեր, տակառ, ծաղկաման, դահուկ, մահճակալ, սրբիչ:
3.Նախադասությունից ամեն անգամ մեկ բառ հանելով՝ ստացիր պարզ համառոտ նախադասույթուն ՝ Լուսաբացին այգում փոքրիկ, չարաճճի նապաստակները վազվզում էին:
4.ություն մասնիկն առանձնացրու բառերից և նոր բառեր ստացիր՝ լավություն, մեծություն, ծերություն, տաքություն, ճոխություն, տարբերություն, չարություն:
5.Դուրս գրիր այն բառերը, որոնք կենդանի են նշանակում՝ եղնիկ, քար, սեղան, այծ, գառնուկ, մատանի, լույս, շուն, պատուհան, ձի, կատու, առյուծ, սար, մեքենա:
6.Բառերին ավելացրու ություն ածանցը և նոր բառեր ստացիր՝ լավ, հին, տաք, մեծ, վատ, երջանիկ, մայր, հավերժ:
Գուշակիր հանելուկները
***
Մարդուն մոտիկ ու մտերիմ՝
Կենդանի է հավատարիմ,
Հսկում է նա փողոց ու բակ,
Չի ընդունում ոչ մի կաշառք:
***
Այն ի՞նչ իր է՝ դրված տան մեջ,
Որ պատկերդ ես տեսնում իր մեջ:
***
Ամբողջ օրը քուն չունի,
Լայն դաշտերում տուն չունի,
Ծաղկից ծաղիկ է թռչում,
Փեթակ ունի, բույն չունի:
***
Հագնում է կանաչ ու շքեղ շորեր
Եվ զարդարում է հողագունդը մեր,
Զարթոնք է բերում սարին ու դաշտին՝
Զուգում, պճնում է անտառ ու այգի:
Պատմիր գրքի, մարդու, ծաղկի մասին՝ առանց անունները տալու:
Տեքստային աշխատանք
Կամակոր այծիկները
Երկու կամակոր այծ մի նեղ կամրջի վրա հանդիպեցին: Երկուսը միասին չէին կարող անցնել կամրջով. պետք է նրանցից մեկը մյուսին ճանապարհ տար:
— Դու ետ գնա, որ ես անցնեմ,- ասաց մի այծիկը:
— Ինչո՞ւ դու ետ չես գնում, որ ինձ ես ասում,- պատասխանեց մյուսը:
Այծիկները վիճեցին. ճակատ ճակատի խփեցին, սայթաքեցին ու ընկան ջուրը:
1. Ինչպիսի՞ն էին այծիկները: Ճիշտ պատասխանը նշի՛ր:
ա) խելացի
բ) կամակոր
գ) զիջող
դ) անխելք
2.Այծիկները որտե՞ղ իրար հանդիպեցին: Նշի՛ր համապատասխան նախադասությունը:
3. Ինչպե՞ս ավարտվեց պատմությունը: Նշի՛ր համապատասխան նախադասությունը:
4. Ինչպե՞ս են անվանում այս կենդանիների ձագերին:
այծ — ուլ
կով-
խոզ-
արջ-
հավ-
շուն-
Գիտե՞ս, որ…
Թռչնի անկողինը միշտ իր հետ է: Նրա ներքնակը փորի փետուրներն են: Նրա վերմակը մեջքի փետուրներն են: Այդքան տաք անկողնով կարելի է քնել ամեն տեղ` հողի, ջրի, ձյան վրա և նույնիսկ` ձյան մեջ:
1. Ավարտի՛ր նախադասությունները:
Նրա ներքնակը
Նրա վերմակը
2.Ձեր բակում ի՞նչ թռչուններ կան: Գրի՛ր նրանց անունները:
3. Կազմի՛ր նոր բառեր՝ փոխելով բառերի առաջին տառեր՝
լող
մատ
մարդ
մութ
սար
լուր
Գիտե՞ս, որ
Մեղուները շատ աշխատասեր են: Փեթակում ամեն մեղու իր աշխատանքն ունի: Մի մասը կեր է բերում: Մյուսները դա լցնում են մեղրահացերի մեջ: Մի խումբ մեղուներ մաքրում են մեղրահացերը: Մյուս խումբը թափահարում է թևիկները և օդափոխում փեթակը: Մեղուներն ունեն նաև պահակներ: Նրանք պահպանում են մուտքը: Միայն մայր մեղուն չի աշխատում: Բոլորը խնամում են նրան: Փեթակում միայն նա է ձվեր դնում: Հետո դրանցից փոքրիկ մեղուներ են դուրս գալիս:
1.Ինչպիսի՞ միջատներ են մեղուները: Նշի՛ր ճիշտ պատասխանը:
փոքրիկ
հսկա
ծույլ
աշխատասեր
2.Շարունակի՛ր.
աշխատասեր – ծույլ
առողջ –
մեծ –
ուժեղ –
սառը –
բարձր –